البت باتعه قصيدة للشيخ أمين الديب

بسم الله الرحمن الرحيم

البت باتعه
شعر أمين الديب

البت باتعه... بنت زيد عبد الصبور
اللي امها يوم عرسها
كان عفشها ... حلة وبابور
ومعاه كمان صندوق خشب
كان اصله سحارة صابون
فيه بنستين والمكحلة
ومراية والفلاية والملقاط
وحجر وليفة ومبخرة
وقزازة كان فيها البخور
وقزازة كان فيها البخور
وجوز صحون
ومنٍخُلين..
والطشت والقروانه والغربال..
ومقشّه ليف...
ومقشتين عرجون
وزير وزلعة وقلتين وماجور
وحصيره من سوق التلات
ولحاف بإيدها منجداه
ومخدتين
والوش كان دمُّور
في الانفتاح
علي رأي صاحبي ولانبطاح
وفتحنا مصر سداح مداح
ونسينا حي علي الكفاح
والشعب محكوم بالسلاح
اتلخبطت كل الأمور
وقيم كتير
وعادات كتير اتغيرت
من ضمنها غًلو المهور
البنت دي
بنت أم باتعه
مش عاجبه حد في مشيها
إكمنًّها.. مشيت طريقها لوحدها
والأسرة غابت عنًّها
مشغولة عنها بعبئها
سايبينها هيًّ وشأنها
وإكمنًّها مستهدفه
الأجنبي ومعاه غبي
فكّر لها
قال أولا:
ترفض معيشة أهلها
ترفض أوامر ربها
ترمي الحياء والانتماء ورا ضهرها
تقطع جدورها بنفسها
أوعز لها
إزاي حتعرض لحمها
وتبان مفاتن جسمها
من ضفرها.. لأعلي خصله ف شعرها
عمل الصالات... تعرض موضات
والاعلانات... ماليه الشاشات
بالشنبوهات والتسريحات
وحاجات كتير فرحت بها
تاهت ونسيت نفسها
وتكلًّمك ربع الكلام بالأجنبي
وتقول هالو...
بنت أم باتعه تقول هالو
مرسيه يا شوشو وثانك يو
وكَمٍ يا توتو وياللا جو
وكبار شيوخ المسلمين
ما عرفش ليه مًتلجًّمين
والمسئولين... فتحوا الببان علي وًسعها
قام قال سلامة ألمًّها
يمكن تغيّر فكرها
ترجع لدينها وربها
وتعيش حياتها بحلوها وبمرها
راح لـ أمها...
يخطبها منها وقال لها
بصراحه بنتك..
عاوزه حد يلمّها
وأنا قدّها
قالت: وماله
البنت يلزمها الجواز
شخشخ جيوبك.. واشتري ياللا الجهاز
قال: اطلبي...
قالت: تجهز شقه.. قد أربع إوض
أحسن نابوليا في البلد
وتجيبها من دمياط
وتجيب نجف من غير عدد
والمكنسة بشفاط
والدِش قبل الدٌش
والفيديو والبوتاجاز
وتجيب لها تلاجة ستاشر قدم
وتجيب لها قبل الجواز...
الفرو والمحمول
وتجيب لها غسالة فول
أنا قصدي فول توماتيك
شقتها كاملة..
زي أي بوتيك
وتجيب لها قبل الجهاز
الشبكة طقم من الدهب
أنا مش حاقولك ألماظ
وتجيب لها فستان زفاف
من غير كمام من غير كتاف
علشان يبين صدرها
وتبان مفاتن جسمها
وتجيب غوازي تزفها
واللي اسمه إيه شهر العسل
في الشرم واللا الغردقة
وبلاش أمور البعزقة
آدي مطلبي
إن كنت قادر مهرها
قرَّب لها
أنا مش حاميّل بختها..
قال: يا ام باتعه حاجيب منين
أنا لاني راجل مرتشي
ولا أحب أجيب بالدّين
ولا أرضي بالتقسيط..
الطاق بيبقي طاقين
ويكتّبوني شيكات
أو أمضي علي ايصالات
علي إنها امانات
وحكاية مش هيّ
لو بس فات شهرين
مادفعتلوش قسطين
بدل المحامي اتنين
حايجيب له رفض الشيك
ومصيبه وقضيه
ومش حاقولك عالقرف
وحاجات مخلًّه بالشرف
اما البوليس والمحكمه
حابقي ف نظرهم منحرف
وباكسر القوانين
شوفي يا ام باتعه
أنا عندي شقه محندقه
معقوله ماهش ضيقه
فيها يادوب أوضتين
وعملت جمعيه
مع ناس أماره زيكم
وقبضتها ألفين
وادي اللي عندي وقلتلك بصراحه
وبإذن واحد أحد
ربًّك حايفرجها..
وباتعه حتريَّحك.. وتعيش مرتاحه
قالت له: قم من هنا
قم فضها سيره
أنا احترمتك.. عشان الأهل والجيره
بتقولي الفين جنيه?!!
وانا اللي قال بافتكر..
باتعه حاتخد بيه
حافظ علي كلمتك يا اهبل..
وخلًّيك زوق
دي باتعه طول عمرها
دايما تبص لفوق
لاحمر ولاخضر
وشي محزَّق وبنطلونات
والشعر فوق كتفها سايح
وفي الكوافير
مش كل طير يندبح
خد دش وانت تفوق
وتفوق لنفسك
وتتكلم كلام موزون
وفرضنا انت اللي عاقل
والمستمع مجنون !
ألفين جنيه للغوازي واللا للمأذون?!!
فيه ناس كتير زيكم مش عايشة في الدنيا.
مابتسمعوش الرداوي.. واللا تلفزيون?!!
شفت اللي بيقدمه الحاج متولي?!!
الشقه بالعفش كامله..
وفلوس كتير في البنك
كتبه لعروسته..
دَا غير اللبس والمصاريف
شايفاه بعيني
ولا واحد غريب قالًّلي
كل المسلسل تابعته دقيقه بدقيقه
والحاج متولي إلاهي لم يشوف ضيقه
راجل صحيح مًقٍتًدًر
كل البنات عاوزاه
وباتعه بنتي..
إلاهي يكون نصيبها معاه
مش جاي تقولي الشباب !!
أنا ناقصه هَمٍ تقيل
قال: يا ام باتعه اسمعيني
كل دا تمثيل
قالت له: ده قصر ديل
وبلاش كلام فاضي
الشعب راضي
مافيش غيرك عامل لي تقيل
ما تكونش ماهر يا شاطر
واسم أبوك عطار
والشاي علي النار
وقاعد لسَّه عالرمله
والحلوه تيجي تلاقيك
فارش لها المنديل.?!
قال: يا ام باتعه
دي ناس بتوزع الأوهام
ساعدوا العدو بجهلهم
في الحرب عالإسلام
وأنا مش بالوم جهلهم
اللوم علي الإعلام
قالت: خلاصة الكلام
أنا بنتي مش من وقمكم
شوفولكو ناس علي قدًّكم
أنا بنتي حلوه مثقفه
حافظه الأغاني كلها.
أحدث شرايط عندها.
دي لما تلبس بنطلونها الجينز
كل الشباب تجري وتخطب ودّها
ونانسي عَجرم نفسها
ما تجيش في خصله ف شعرها
ولا تيجي ضفر ف رجلها
طب والنبي...
لو شافها واحد أجنبي
ليجيب لها.
كل اللي ييجي ف نفسها

لا تنسوا الرد والتسجيل

بارك الله فيك

قول ياعم الشيخ أمين

الله ينور عليك ايه الحاجات الجميله والشغل العالى ده بالتوفيق انشاء الله

وياترى البت باتعه اخبارها ايه دلوقتى

وياترى البت باتعه اخبارها ايه دلوقتى

اكيد البت بتعه مش هتتجوز خالص

حرام علي ام بتعه

بصراحه سلامه يستاهل اللى حصله ايه اللى يوديه يتقدم للبت باتعه دى
يستااااااااااااااهل طلع فى الاخر اهبل

بسم الله الرحمن الرحيم

شكرا يامحمد ع الرد
واتمني مزيدا من الرد
بس باتعه عايزه واحد زي ميتو بقي هاتله واحد انت ولا اتقدم

بسم الله الرحمن الرحيم

ازيك ياسارة
شكرا للرد
الباتعه دلوقتي لسه مستنية نصيبها
هو مش اهبل اوي بس في ناس كتير زي باتعه
يارب تفضلي منورة كدا

يعينى عليك يا سلامة وقعت ولا حد سما عليك



بصراحة باتعة وامها طلعين لفوق اوى


وسلامة منشفها برضو اوىىىىىىىىىى


على العموم مشكور على القصيدة الجميلة
ويارب دايما للامام

يعينى عليك يا سلامة وقعت ولا حد سما عليك



بصراحة باتعة وامها طلعين لفوق اوى

وسلامة منشفها برضو اوى


على العموم مشكور على القصيدة الجميلة
يا احمد

وعلى فكره ياساره النور مش نورك دا نور الشاشه

ــــــــــــــــــــــــــــــــــــــــــــــــــــــــــــــــــــــــــــــــــــ

تعلم الهكر لحمايتك

ونظل نسلك فى الحياة طريقنا...
نمضى على الدرب الطويل
لكى نصارع...يأسنا
قد تمسح الايام فيه دموعنا
اوتستبيح جراحنا
ونظل نمضى...فى الطريق
واتيت يوما...للطريق
كل الذى فى القلب كان شجيره..
تتظلل الامال فيها.. والزهور
والحب فى الاعماق يحملنى بعيدا كالطيور
والعمر عندى لحظه
تتحطم الاسوار فيها ...والجسور
تتجسد الافكار فيها والشعور
ان عاشها الانسان يوما
ليس تعنيه الشهور....!

فاروق جويده