موضوع: قصيدة اخر كلام للشيخ أمين الديب الأربعاء مارس 19, 2008 8:14 am
السلام عليكم ورحمة الله وبركاته
أخر كلام بعد مابقلع هدومى قبل نومى لازم أقرا كام مقاله نرفزونى..سخنونى حفزونى..إنى أكتب عن ولاد الكلب والسفاح شارون قول سهرت نمت..بعد الفجر ما إدن والعيال بيقومونى صحصحونى قمت مفزوع من منامى هجت فيهم جت مراتى قالت لى..مالك إيه جرالك؟ ليه بتشخط فى العيال قلت باحلم كنت باحلم إنى ميت وانفزعت انبسطى..؟ كشرت وبسرعة قالت: إيه دا أصله. طب وماله يستحق الموت وأكثر اللى يهرب من عياله كنت فين م المغربية؟ تيجى بعد الفجر مادن؟ إنت فاكر إن دا ح يخيل على شعر إيه؟ واللا إيه بتهببه.. وتقول قضيه هى فين هى القضيه؟ هم يعنى كلمتينك.. اللى حى يحلوا القضية؟ هيه ناقصة وإحنا مالنا ما انت شايف . كله خايف والمدافع همسه حايره..عالشفايف وانت عارف الصهاينة ناس قويه.. ومفتريه واللى أدهى من داكله لما يبقى الكل نايم.. وانت قال تكتب قصيده!! عن ولاد الكلب والسفاح شارون أبقى نايمه!! أسمعك بتقول شارون؟ من غير سلام ولا يحزنون! انت فاهم إنه ح يهمه الكلام؟ واللا دول عايزين سلام؟ واللا ح يخاف من كلام؟ هو همه من كلينتون. واللابوش واللاهمه من باراك.. واللاهمه من...! واللا عايز تبقى شاعر؟ واللا من أبنود جنابك؟ واللا عايز تقديريه؟ قلت طبعاً أى شاعر يستحق التقديريه يستاهلها عن جداره مش خساره ليه يا خويا هو طلع إسرائيل؟ واللا عمر فى الصحارا حاجه تانيه!! والقطاع العام بيخسر كان منع عنه الخساره؟ واللاسكان المقابر كان بنالهم كام عماره؟ واللاشغل ألف عامل أو منعهم من الدواره؟ واللا وزع عالغلابة ألف طن من الدقيق واللاحتى كام شيكاره؟ فوق لروحك هو خدها عن وهيبه والأغانى لعبد حليم مش عشان حل القضيه القضية هى.. هى واحنا فى الخيبه القويه! قلت جاهله. إنتى جاهله انتى فاكره الشعر ساهل؟ دا اللى ينكر فضل شاعر يبقى جاهل قلبك ابيض مش حترجع الا لما يحبسوك عالكبر ويبهدلوك انت بتقول يا سادتنا يا قادتنا.. ارفضوا تهديد أمريكا والتحيز لليهود؟ طب ولو زعلت أمريكا طب منين حيأكلونا؟ والحكومة نفسها بتمد إيدها ويقولوا لهم شحتونا!! انت عايز يحبسونا ؟ لوعايزنا نقب اكتب حط همك فى الأغانى فطر الشعب بأغانى نيم الشعب باغانى والأغانى.. بيبعوها بالدولار الأمريكانى واللا يعنى جت علينا واشتهينا الفقر.. تانى؟ عيش وهيص شجع الأبطال ولادنا اللى رفعوا راس بلدنا مسخروا أولاد ناميبيا واللا ليبيا. عيش وهيص.. انت يعنى كنت غاندى..؟ واللا حافظ واللا شوقى؟ واللا بيرم أو جاهين؟ مانت طول عمرك بتكتب! حد سمعك؟ قول لى مين؟ والا كام واحد بيحضر فى النداوى ف أى حته حتلاقيهم..خمسه سته! أما لو تكتب أغانى تبقى نجم ولك سماك واللى جاى يطلب لقاك واللى يتصور معاك والصحافة والإذاعه والبرامج.. كله ح يسجل معاك زى شعبان عبدالرحيم واللا شوف جمهور حكيم تبقى شاعر زى صاحبك كل واحد يرضى عنك الحكومه والصهاينه والخلايجه والتوانسه والاجانب والذوات بالخصوص صنف البنات هو دا آخر كلامى تمشى بيه.. أو تفارق من سكات ميت يمين ماتقول قصيده لاملا كل الدار صوات واللى يسأل تانى عنك راح اقول له غار ومات!
محمد وجيه
المساهمات : 13 تاريخ التسجيل : 20/03/2008
موضوع: قصيدة اخر كلام للشيخ أمين الديب السبت مارس 22, 2008 9:51 am
هو ده الشغل ياعمي امين
sara
المساهمات : 21 تاريخ التسجيل : 22/03/2008
موضوع: ساره الإثنين مارس 24, 2008 10:12 pm
قصيده جميله جداااااااااااا,بس هو احنا هنعمل ايه اكتر من الكلام ؟!
sara
المساهمات : 21 تاريخ التسجيل : 22/03/2008
موضوع: ساره الثلاثاء مارس 25, 2008 1:14 am
ان مقدرتش تضحك متدمعش ولا تبكيش وان مفضلش معاك غير قلبك مش هتموت هتعيش وان سألوك الناس عن ضى جوا عيونك ما بيلمعش متخبيش قولهم العيب مش فيا ده العيب فى الضى وانا مش عاشق ضلمه ولا زعلت الضى ومصير الضى لوحده هيلمع ومصير الضحك لوحده هيطلع ده الضحك لوحده مبيجرحش ولا ياذيش
sara
المساهمات : 21 تاريخ التسجيل : 22/03/2008
موضوع: ساره الجمعة مارس 28, 2008 10:48 pm
لا تغرنك!.. لا تغرنك دمعة الزاهد فربما كانت لفرار الدنيا من يده، ولا تغرنك بسمة الظالم، فربما كانت لإحكام الطوق في عنقك، ولا تغرنك مسالمة الغادر، فربما كانت للوثوب عليك، ولا يغرنك بكاء الزوجة، فربما كان لإخفاقها في السيطرة عليك!.
Admin Admin
المساهمات : 122 تاريخ التسجيل : 16/03/2008
موضوع: الرد ع سارة الأربعاء أبريل 02, 2008 11:02 am
جزاكي الله خيرا ياسارة
ايه الكلام الجميل ده
ممكن تكمليه ويكون موضوع وتعمليه موضوع جديد بدل الرد هيكون احسن كتير
sara
المساهمات : 21 تاريخ التسجيل : 22/03/2008
موضوع: رد: قصيدة اخر كلام للشيخ أمين الديب السبت أبريل 12, 2008 8:06 am
يا جماعه احمد من فتره مش عمل اى اضافات للمنتدى يارب يكون المانع خير لو حد يطمنا عليه من اللى يعرفوه يكون مشكور جدااااااااا
الأربعاء مارس 19, 2008 8:14 am
.jpg)
